Reto 01

Tui para vivir

Queremos que Tui sexa unha opción real para quen busca un lugar no que vivir, independizarse, estudar, formar unha familia ou volver. Para iso queremos recuperar os espazos que xa temos, coidar os servizos das parroquias e abrir oportunidades para que máis persoas poidan facer vida aquí.

En 2023: vivenda, casco histórico, alugueiro e estudantes. Agora incorporamos tamén o mantemento e os servizos de cada parroquia.

PROXECTO 1.1

CASAS QUE VOLVEN TER VIDA

PROPOSTA DO EQUIPO

En Tui existen vivendas baleiras, edificios que poderían recuperarse e inmobles que necesitan rehabilitación, ao mesmo tempo que acceder a unha vivenda habitual ou de alugueiro resulta difícil para moitas persoas.

Queremos empezar pola vivenda que xa existe: coñecer que inmobles poden recuperarse, facilitar desde o Concello os trámites que permitan facelo e estudar incentivos para que máis propietarios rehabiliten ou incorporen vivendas ao alugueiro habitual. No conxunto histórico, recuperar vivenda significa ademais recuperar veciñanza e vida diaria.

Pequenas metas

  1. 01Crear un mapa de vivendas baleiras e inmobles con posibilidades reais de recuperación.
  2. 02Identificar edificios nos que a rehabilitación poida permitir recuperar varias vivendas.
  3. 03Revisar os trámites municipais que actualmente dificultan ou atrasan a rehabilitación.
  4. 04Crear incentivos e acompañamento para rehabilitar e poñer vivenda en uso.
  5. 05Favorecer que parte desa vivenda recuperada se destine a residencia habitual e alugueiro.
Onde queremos chegar

Que as casas baleiras ou deterioradas que poidan recuperarse volvan ter vida e que máis persoas atopen en Tui un lugar onde vivir.

PROXECTO 1.2

TUI UNIVERSITARIO

PROPOSTA DO EQUIPO

Temos o CUVI moi preto e queremos aproveitar esa proximidade para atraer estudantes a vivir en Tui. Queremos que durante os seus anos universitarios esas persoas fagan vida en Tui: que compren aquí, fagan deporte, participen na cultura, saian, coñezan a cidade e formen parte dela.

Vivenda e transporte

Para que isto funcione hai dúas condicións que teñen que resolverse xuntas: ter onde vivir e poder chegar ao CUVI de maneira práctica.

Queremos identificar vivendas, edificios ou outras fórmulas que poidan crear unha primeira oferta de aloxamento universitario e deseñar unha conexión co campus adaptada aos horarios reais dos estudantes. O aloxamento e a conexión co campus deben avanzar xuntos.

Integrarse na vida de Tui

Tui Universitario abranguería tamén a vida cultural, deportiva e social da cidade. Queremos conectar os estudantes coa programación cultural, instalacións deportivas, comercio, asociacións, voluntariado e vida social da cidade.

Pequenas metas

  1. 01Localizar posibilidades concretas para crear unha primeira oferta de aloxamento universitario.
  2. 02Deseñar unha conexión Tui-CUVI adaptada aos horarios universitarios.
  3. 03Trasladar a proposta á administración competente no transporte interurbano e valorar con ela o encaixe e a posta en marcha da conexión.
  4. 04Crear unha primeira experiencia piloto cun número asumible de estudantes.
  5. 05Incorporar vantaxes ou propostas que faciliten a súa participación na vida de Tui.
  6. 06Avaliar a experiencia e ampliala se funciona.
Onde queremos chegar

Atraer poboación nova a Tui, conseguir que forme parte da cidade durante a súa etapa universitaria e crear vínculos que poidan continuar despois dos estudos.

PROXECTO 1.3

CONVIVENCIA INTERXERACIONAL

PROPOSTA DO EQUIPO

En Tui hai persoas maiores que viven soas e persoas novas ou estudantes que necesitan unha vivenda accesible. Queremos conectar ambas realidades mediante un programa municipal voluntario e supervisado.

A persoa maior podería ofrecer unha habitación en condicións vantaxosas e a persoa nova asumiría compromisos previamente acordados de compañía e convivencia. A persoa nova asumiría un papel de compañía e convivencia, mantendo os coidados profesionais que a persoa maior precise.

O Concello organizaría o programa: entrevistas, selección, compatibilidade entre as persoas, acordo de convivencia, seguimento e mediación se aparece algún problema.

Pequenas metas

  1. 01Crear as normas e garantías do programa.
  2. 02Abrir unha primeira convocatoria para ambos perfís.
  3. 03Realizar entrevistas e emparellamentos supervisados.
  4. 04Acompañar as primeiras convivencias durante todo o proceso.
  5. 05Avaliar os resultados antes de ampliar o programa.
Onde queremos chegar

Facilitar vivenda á xente nova e crear ao mesmo tempo unha nova ferramenta contra a soidade non desexada.

PROXECTO 1.4

COIDAR CADA PARROQUIA

PROPOSTA DO EQUIPO

Vivir ben en Tui tamén depende das cousas de cada día. Un camiño no que medra a herba, unha luz que falta ou problemas de saneamento e conexión a internet poden afectar moito á vida dunha parroquia.

Queremos escoitar o que acontece en cada lugar e facer un repaso, parroquia por parroquia, do mantemento e dos servizos básicos: limpeza e desbroce dos espazos públicos, alumeado, cableado, saneamento e acceso a internet. Hai problemas que pode atender o Concello e outros que requiren falar coas empresas e administracións responsables.

Con esa información, e co asesoramento dos profesionais correspondentes, poderemos distinguir o que se pode arranxar axiña do que necesita un proxecto, permisos ou colaboración doutras entidades. Cada parroquia merece saber que se estudou, a quen lle corresponde actuar e que solución se propón.

Pequenas metas

  1. 01Recoller coas persoas de cada parroquia os problemas de mantemento e servizos que máis afectan á súa vida diaria.
  2. 02Revisar sobre o terreo os espazos públicos que precisan limpeza, roza ou reparación.
  3. 03Identificar necesidades de alumeado, cableado, saneamento e conexión a internet, e comprobar quen ten competencia en cada caso.
  4. 04Acordar cos profesionais as actuacións viables e coordinarse coas empresas e administracións responsables cando corresponda.
  5. 05Explicar a cada parroquia as solucións propostas e facer seguimento das que se poñan en marcha.
Onde queremos chegar

Que o mantemento e os servizos básicos respondan ás necesidades reais de cada parroquia, con solucións estudadas e responsabilidades claras.